General Santos City – Human natudlo isip bag-ong labaw sa Traffic Enforcement Unit (TEU) ning dakbayan sa Gensan si PCPT Lamberto M. Rabino Jr. gilayon kining mi-courtesy visit o nakigtagbo kang Gensan City Mayor Lorelie Pacquiao.
Kini isip matud pa pagpakita sa iyang pagrespeto ug pakighi-usa ngadto sa Alkalde ning dakbayan isip kasamtangang Officer-In-Charge sa TEU-GENSAN hulip kang PLt.Col. Oliver Pauya.
Atol sa ilang tigom, ilang gituki ang pagpalig-on sa koordinasyon tali sa lokal nga kagamhanan ug sa TEU aron mas molambo ang dagan sa trapiko sa dakbayan.
Giabiabi ni Mayor Pacquiao si PCPT Rabino ug gipadayag ang iyang suporta sa mga inisyatibo sa TEU.
Gihatagan niya og gibug-aton ang kamahinungdanon sa saktong pagpatuman sa mga balaod sa trapiko aron masiguro ang kaluwasan sa mga motorista ug mga lumulupyo sa General Santos City. (Rem Agdon)