Tupi, South Cotabato – Mukabat sa kapin 6 mil ka punuan sa fully grown marijuana ang gipang-ibot sa mga sakop sa Tupi Municipal Police Station sa nakaplagang marijuana plantation sa bahin sa Sitio Benigno, Barangay Miasong, Tupi, South Cotabato niadtong nakalabayng adlaw.
Sumala ni Police Master Sergeant Rhea Gatinao, tigpamaba sa Tupi Municipal Police Station, ang napang-ibot nga marijuana gibana-banaang mokantidad ug 1.2 million pesos.
Gilayon usab nga gisunog sa mga otoridad ang mga napang-ibot nga punuan sa marijuana aron masigurong dili na kini magamit pa. Samtang aron nga masiguro nga wala nay mabiling punuan sa marijuana sa lugar gisprayhan sa kapulisan ug herbicide ang 500 square meters nga luna nga gitamnan sa maong mga marijuana.
Ginganlan usab sa kapulisan ang cultivator sa maong marijuana plantation nga mao si Alias Erick Doremon nga taga Barangay Pula Bato, Tampakan, South Cotabato.
Nasayran nga wala sa lugar ang maong suspek dihang gihimo ang operasyon. Possible usab nga mag-atubang ug kaso ang cultivator nga si Alias Erick Doremon.
(Source: PCADG-12, photo credit to the owner)
