Nangipaay ti gobierno probinsial babaen iti Sustainable Development Center ti “fuel subsidy” kadagiti mannalon ti ili a Sarrat.
Segun kenni Mrs. Luz Ortal, Officer In-charge ti nadakamat a pangopisinaan, sanga gasut innem a pulo a mannalon iti nasao nga ili ti nabenipisiaran.
Kunana a ti “fuel subsidy, irrigation support” ket napanunotan ni Gob. Matthew J. Marcos Manotoc a programa a pangtulong kadagiti mannalon gapu iti kinangina dagiti produkto a petrolyo kas iti krudo ken gasolina.
Imbatadna a ti pay laeng ili a Sarrat ti maikadua nga ili a pakaipaayan ti “fuel subsidy” kadagiti mannalon ditoy probinsia.
Maipalagip nga immuna dagiti innem a pulo ket dua a mannalon iti Brgy. Salbang kadagiti naikkan ti gasolina wenno krudo nga agbalor ti sangaribu a pisos nga usarenda a mangpasayak kadagiti mula dagitoy iti kataltalonan.
Inbunannag ni Ortal a dagiti nakasagana a maisaruno nga ili a pakaipatungpalan ti nasao a programa ket ti ili a San Nicolas, Laoag City, Bacarra, Pasuquin ken dagiti dadduma pay nga ili.
Nupay kasta, kunana a dagiti nadakamat nga ili ti nakakumpleton kadagiti kasapulan a dokumento para iti pannakaipaay ti nasao a tulong kadagiti mannalon.
Inlawlawagna a ti puntiria a bilang dagiti mabenipisiaran iti daytoy a programa ita a tawen ket dua ribu a mannalon.
Namnamaenna a makaipaay ti nasao a programa ti dakkel a tulong kadagiti mannalon ditoy probinsia nangnangruna iti daytoy a gundaway a marikna unay dagitoy ti nakaro a rigat gapu iti kinangina ti presyo dagiti kasapulanda nga agtalon.
Innayonna a mabalin met pay dagiti mannalon kadagiti ili a nakaipatungpalanen ti nasao a programa ti agkiddaw ngem nasken a maiyun-una dagiti dadduma a munisipio nga immuna a nagkiddaw nga agkasapulan unay iti nasao a tulong.
Author: Irene Ringor
Source: PGIN