Sarangani Province – Ang LGU Malungon, pinangulohan ni Mayor, Atty. Tessa Constantino, pinaagi sa Municipal Social Welfare and Development Office nga gipangulohan ni Ruth A. Arangote (MSWDO), miduyog sa nasod sa pagsaulog sa ika-32 nga National Children’s Month (Nobyembre 2024) nga adunay tema nga “Break the Prevalence, Tapuson ang Kapintasan: Pagpanalipod sa mga Bata, Paghimo sa Luwas nga Pilipinas.”
Gilusad kini kaganinang buntag, Nobyembre 4, 2024 atol sa flag raising ceremony sa Sunken Arena, diin ang tanan nga mitambong ni-recite sa “Panatang Makabata,” usa ka panumpa sa pagpanalipod sa katungod sa matag bata.
Kini nga selebrasyon subay sa Republic Act No.10661, s. 2015 nga nagdeklarar sa buwan sa Nobyembre sa matag tuig isip “National Children’s Month”.
Kini nga deklarasyon naghandom sa pagsagop sa Convention on the Rights of the Child sa United Nations General Assembly niadtong Nobyembre 20, 1989.
Ang CRC nagtumong sa pagpanalipod sa mga bata gikan sa tanang matang sa pisikal o mental nga kapintasan, kadaot ug pag-abuso, pagpasagad o pagpabaya sa pagtratar, maltreatment, pagpahimulos ug sekswal nga pag-abuso. (Rem Agdon)
(Source: MIO-Malungon)