General Santos City – Aron nga masolusyonan ang housing gap sa tibuok nasud, ang Department of Human Settlements and Urban Development Region 12 (DHSUD 12) nagpahigayon ug ikadugang hugna sa SOX Housing Fair: HanapBahay sa Rehiyon Dose with the theme “Pamanang Pabahay sa Rehiyon Dose: Walang Pilipinong Walang Bahay sa Sariling Bayan” nga gihimo niadtong Sabado, October 22, 2022, sa Veranza Mall, GenSan.
Matud ni GenSan City Councilor Atty. Dominador Lagare, Jr., kansa maoy nagrepresentar kang Gensan City Mayor Lorelie Pacquiao, gisiguro sa lokal nga panggamhanan sa syudad nga suportado nila ang susamang gimbuhaton kansa makatabang ug dako ngadto sa katawhan.
Samtang si GenSan Lone District Congressman Atty. Loreto “Ton” Acharon, kansa girepresentahan ni Atty. Joahanna Acharon, nagpadayag ug kalipay sa gihimo sa DHSUD 12 ug mga partners nga ahensya sa gobyerno ug mga developers sa ilang inisyatibo pinaagi sa programa sama sa 2nd Housing Fair. Gihingusgan usab niini ang tibuok suporta sa maong mga lakang.
Nasayran nga ang 2nd SOX House Fair ang takda nang mahuman karong adlawa, October 24, 2022. Nasayran nga mukabat sa 16 ka developers ang nag-exhibit sa ilang housing services. Ang Housing Fair ang alayon usab sa National Housing Month, nga ginaselebrar matag bulan sa Oktubre.
(Source: GenSan City Public Information Office)