General Santos: 120 KA BURAK NGA MGA TAMBUTSO SA MGA MOTORSIKLO, GIPIGSAT SA PISON

Alabel, Sarangani Province – Mikabat gayud sa 120 ka nakompiskang burak nga mga tambutso ang gipalignsan og pison sa Alabel, Sarangani Province.

Kabahin kini sa kampanya sa Lokal nga Panggamhanan sa Alabel nga gidumala karon ni Mayor Vic Paul Salarda.

Misaksi sa pag-pison sa burak nga mga tambutso ang mga opisyal ug empleyado sa LGU-Alabel, mga opisyal sa Barangay ug kapulisan.

Nunot kini sa Muncipal Ordinance sa Pangagamhanang Lokal sa nasampit nga lungsod batok sa burak nga mga tambutso sa motorsiklo tungod nakahatag kini’g dakung katugaw o purwisyo sa publiko hilabi na panahon sa kagabhi-on.

Kini nagpakita nga seryoso ang LGU-Alabel ug PNP-Alabel sa kampanya batok sa banha-an nga mga tambutso.

Butyag ni Alabel Chief of Police Lt.Col. Reynaldo Delantien nga ang mga gipaligsan nga tambutso nakumpiska nila sa gimuntar nga PNP check point ug uban pang operasyon sa lungsod sa nakalabayng mga bulan.

Dugang butyag pa sa maong opisyal nga dili sila mohunong sa pagpangdakop ug pagkompiska sa mga motorsiklo nga adunay burak nga mga tambutso.

Gawas niana, nasayran nga nagahatag og tag-P500 pesos cash incentive nga 500 pesos si Mayor Salarda sa mga makadakup ug makaturnover og burak nga tambutso sa iyahang buhatan.

Gani, ubay-ubay na nga mga Tanod gikan sa Brgy Maribulan, Kawas ug Datal Anggas ug uban pang Barangay ang nakaturnover na sa mga burak nga ilahang nadakpan. (Rem Agdon)