- Advertisement -
Duha ka high value individual (HVI) ang nasikop sa dakbayan sa General Santos human narekober gikan kanila ang P374,000 nga kantidad sa gituohang shabu ubos sa drug buy-bust operation nga gihimo sa mga awtoridad mga alas 12:53 sa hapon, Agosto 22, 2023.
Si Police Brigadier General Jimili L Macaraeg, Regional Director sa Police Regional Office 12, niila sa mga suspek nga sila si alyas “Tanggol”, 27, miyembro sa MILF, residente sa Brgy. R87, Cotabato City; ug alyas “Sampaw”, 23, kinsa residente sa Talitay Maguindanao Province.
Nasikop ang duroha sa Brgy Tambler, General Santos City sa mga personahe sa Regional Police Drug Enforcement Unit 12 sa pakigtambayayong sa mga operatiba sa GenSan-Police Station 5, Regional Intelligence Division 12, Regional Intelligence Unit 12, Regional Special Operations Group 12, PDEG – SOU12, City Mobile Force Company ug sa koordinasyon sa Philippine Drugs Enforcement Agency (PDEA) 12. Nasakmit gikan sa mga dinakpan ang gibana-banang 55 gramos sa gituohang shabu nga mobalor og Php374,000.
Kasamtangang gitanggong sa GSCPO-PS5 ang mga suspek ug gikatakdang pasakaan og kasong kalapasan sa R.A 9165 o Comprehensive Dangerous Drug Act of 2002. Ang mga nasakmit nga ebidensiya isumiter sa Forensic Unit, Camp Fermin Lira, Dadiangas West, General Santos City nga ipailawom sa forensic examination. (Rem Agdon)
- Advertisement -