- Advertisement -
Polonuling, Tupi, South Cotabato – Pormal na karong gipa-ilalum sa State of Calamity ang Barangay Polonuling, Tupi, South Cotabato tungod sa kaylap nga epekto sa pagbaha human sa pipila ka adlaw nga pag-ulan. Kini ang gikumpirma ni Barangay Chairman Asir Consing sa pakighinabi sa Media. Ubos sa Barangay Resolution No. 41 series of 2023, daghang mga Sitio ug Purok ang apektado tungod sa pagbaha ug kusog nga pagbunok sa ulan diin natala ang pagkaguba sa mga dalan, sapa, pananom, hayop ug panginabuhian sa mga residente. Ang apektadong Sitio mao ang Alnama, Bunawan ug Lampisay, samtang ang mga apektadong Purok mao ang Purok 1, 2, 3, 4, 6, 11 ug 13.
Gawas niini, natala usab ang pagdahili sa yuta sa mga Sitio sa Lamlikay ug Saipao diin apektado ang mga livelihood projects didto. Subay sa talaan sa MDRRMO-Tupi, 276 ka mga pamilya ang apektado sa maong kalamidad, 27 niini ang gihikling padulong sa evacuation center samtang ubay-ubayng indibidwal ang gibutang sa Polonuling National High School Gym ug ang uban ang anaa sa isolation area. Samtang, sa monitoring sa Provincial Disaster Risk Reduction and Management Office (PDRRMO) gawas sa lungsod sa Tupi, apektado usab ang lungsod sa Tantangan, Norala ug siyudad sa Koronadal. Rey G.Ombaña
Photo courtesy: MDRRMO Norala
- Advertisement -