General Santos City – MOMHO o gamay ra matud pa ang natigayong problema tali nila Gensan lone District CONGRESSWOMAN SHIRLYN BAÑAS ug Gensan City Mayor LORELIE PACQUIAO sa isyu sa opisina sa Kongresista sa bag-ong gitukod nga P47.2 milyong 4-storey building sa Roxas Avenue, Brgy. Dadiangas East, General Santos City.
Kana ang gikanayon ni Gensan City Vice Mayor ATTY. JOSE EDMAR YUMANG human naka-abot kaniya ang impormasyon nga nagtukod og TEMPORARYONG OPISINA si CONG. BAÑAS sa Carlos P Gracia (Freedom) Park sugod kagahapong adlawa, Hulyo 2, 2025 gumikan sa isyu o hugon-hugon nga dili ipagamit ngadto sa nasampit nga Kongresista ang nakagahin nga Congressional Office sa bag-ong gitukod nga 4-storey building nga takdang iturn-over sa DPHW karong umaabot nga Hulyo 15, 2025.
Matud sa BISE ALKALDE ang naasoy nga isyu makahatag og dili maayong epekto sa publiko.
Nunot niini nga sitwasyon, andam matud pa si VM YUMANG nga mopatunga tali nila CONG. BAÑAS ug MAYOR PACQUIAO nga magkasinabot ug malikayan ang panagbangi sa duroha.
Matud sa BISE MAYOR, mamahimong hapsay ang atong dakbyan kung ang mga lider niini nagkasinabot ug adunay usa ka paglantaw o tumong para sa kaayohan sa katawhan ug kalambo-an sa s’yudad.
Busa, andam matud pa siyang mamahimong tulay nga magkasinabot si Cong. Bañas ug Mayor Pacquiao, tungod momho lamang matud pa o gamay ra kaayo ang maong problema.
Kinahanglan lamang matud sa duroha ang gitawag og OPEN COMMUNICATION SA USA’G USA, aron malikayan ang bangi sa isyu sa Opisina sa maong Kongresista. (Rem Agdon)
Photos: CMO/VMO
