Dakkel a tulong ti naiyestablisar a 911 Hotline ditoy Ilocos Norte nangnangruna iti daytoy a panawen ti pandemia.
Impalgak ni Mr. Wilfredo Lorenzo Jr., mangidadaulo ti Information Technology Office ti gobierno probinsial nga iti kallabes a pannakalock-down ti National Capital Region wenno NCR ken idiay Cebu ket nagdiretso amin a tawag iti 911 ditoy probinsia.
Imbunannagna daytoy a banag bayat ti panagbalinna a resource speaker iti pannakatratar ti gakat a mangipaay bileg ken ni Gob. Matthew Marcos Manotoc a sumrek iti naamendaran a katulagan para iti operasion ti 911.
Nupay kasta, naduktalan ni Atty. Da Vinci Crisostomo, chairman ti committee on laws ti Sang. Panlalawigan nga awan ti mabalin a maamendaran a katulagan gapu ta nagngudon ti kontratan.
Inlungalongna ti iseserrek laengen ti gobernador iti baro a katulagan pakaseknan daytoy a banag.
Mainaig iti daytoy, napilitan ti nangiproponer iti gakat a ni ABC Federated Pres. Elmer Faylogna a nangisanud iti naso a gakat. (Ronald Domingo, RPN DZRL Batac Correspondent)
(Source: Provincial Government of Ilocos Norte)