General Santos City – Plano matod pang ibawal na bisan ang food deliveries dungan sa pagpatuman sa “no movement Sunday” ug nightly curfew sa General Santos City.
Gikataho nga ang maong bagong health measure ang lakip sa gikonsidera sa City-IATF nga ipatuman sa siyudad, taliwala sa padayong pagsaka sa mga naigo sa Covid-19. Una nang namatikdan nga luyo sa gipatumang travel restrictions sa adlaw’ng Domingo, daghan gihapon ang makitang naglatagaw sa mga kadalanan. Gikataho usab ang planong pahugtan pa ang pagbantay sa mga border checkpoints ug ang pagbawal nga maka-sulod ang mga nag-overnight sa mga beach resorts.
Atol sa pakighinabi kang Philippine Medical Association-GenSan chapter president Dr. Butch Peñamante, gikumpirma niini nga adunay gi-andam nga bagong executive order alang sa mga kabag-uhan sa gipatumang anti-Covid protocol sa GenSan. “Nagka-meeting kahapon (Huwebes). I believe a new executive order is forthcoming,” ang tipik sa pamahayag ni Peñamante. Una nang girekomenda sa PMA nga ibalik ang siyudad sa mas istriktong modified enhanced community quarantine gumikan sa natala nga pagsaka sa kaso sa Covid-19 sa dakbayan.
Base sa September 16 tracker bulletin sa Department of Health, gikan sa 11,732 nga kinatibukang ihap sa Covid cases, anaa sa 1,145 ang padayong nagpa-alim sa mga balay-tambalanan. Sa karon, anaa na sa 388 ang Covid-deaths sa Gensan ug 10,198 ang ihap sa mga naka-rekober, lakip ang 70 new recoveries.