Adtun Marso 21, 2024, madumduman na nag ground breaking para sa Huy-anan nan Bajau sa Surigao Project sa Sitio Panubigon, Brgy. Lipata.
Kuman na adlaw, Oktubre 7, 2024, syete (7) ka buyan human sa groundbreaking, nag ribbon cutting sanan nag turnover na gajud sa isa ka model unit para sa proyekto.
Ini na proyekto, gipangunahan nan UN Habitat Philippines, kaiban an Lokal na Panggamhanan sa siyudad nan Surigao sanan Probinsya nan Surigao del Norte, Department of Environment and Natural Resources (DENR), Department of Human Settlements and Urban Development (DHSUD), National Commission on Indigenous People (NCIP), Department of Social Welfare and Development (DSWD), Mindanao Development Authority (MINDA), Technical Education and Skills Development Authority (TESDA), sanan iban pa na mga ahensya para maplastar an ato mga kaigsoonang Sama-Bajau.
Didto mismo sa mahinungdanon na turnover si UN Resident Gustavo Gonzales. Personal sab na mitambong si City Mayor Paul Dumlao, Vice Mayor Alfonso S. Casurra, Vice Governor Eddie Gokiangkee Jr., sanan City Councilor Joshua Emilio Geli sa pag turnover sa model unit ngadto sa mga pamilyang Bajau.
Wayay puas sab an suporta ni UN-Habitat Country Programme Manager Christopher E. Rollo, Caraga DHSUD Regional Director Cristie Y. Reyes, MINDA Northeastern Mindanao Area Head Engr. Emelian Lawansa, DSWD Caraga Region Assistant Regional Director Jean Paul Parajes, NCIP Regional Director Ordonio Rocero Jr., sanan TESDA Regional Director Florencio Sunico Jr.
Mapasalamaton karajaw si Sama-Bajau Chieftain Ms. Dahila Araman sanan an President nan Sama-Bajau Magdakayo Homeowners Association Mr. Bay Jhonny Sapayani, kay maplastar na gajud ila komunidad sanan nahatagan na gajud sila nan suporta sanan pagtagad nan gobyerno.
An disenyo sa ila mga bayay, isa ka quadruplex type kung diin upat na ka pamilya dajun ang makahuya sa bag-o na model unit.
Gipahigayon an turnover kuman dungan sa World Habitat Day, na tumong mahatagan nan dako na pagtagad an katungod nan isa ka tawo para sa sakto na huy-anan.
Ini na proyekto simbolo sab nan padajon na suporta nan gobyerno para sa inclusive growth, sustainable development, sanan sa pagpalambo nan kinabuhi sa tanan, labi na sa mga lumad o marginalized na sektor. Ang kalampusan sa turnover nagpapakita sa kooperasyon nan lokal sanan international na mga partner, sanan naghatag paglaom para sa mga pamilyang Sama-Bajau.
(Source: Surigao City PIO)