28.9 C
Manila
Friday, March 29, 2024

Face-To-Face Classes Iginigilid Pa Kan DepEd

- Advertisement -




Iriga City – Dai pang kasegurohan kun ibubuelta na an face-to-face classes sa masunod na school year 2021-2022 mantang pigsumiter na kan Department of Education (DepEd) ki Presidente Rodrigo Roa Duterte an planong burokasan nin klase sa Agosto 26 alagad puede man sa Setyembre 30.

Si Regional Director Gilbert Sadsad kan DepEd Bicol nagpahayag kaini sa entrevista kan Bicol Mail sa paagi nin telepono mientras pataposon na an presenteng school year sa Hulyo 10, 2021 asin saindang pig-aandaman an burokasan nin klase.

Si DepEd Secretary Leonor Briones nagsumiter na kan preparasyon para sa burokasan nin klase sa sunod na school year alagad huli kan pandemya yaon na ki Duterte an bola kun aaprubaran an rekomendasyon kan ahencia, sabi pa ni Sadsad.

Dai palang nahahaloy nagkaperang mga escuelas publica sa rehiyon Bicol an pigsumiter ni Sadsad sa DepEd national office na preparado na sa limitadong face-to-face classes alagad nagkibrada an desisyon kan gobierno nasyonal na cancelaron an ano man na pagbuelta sa classroom kan mga klase huli kan naglalangkaw na caso kan coronavirus disease (Covid- 19).

Si Vaccine Czar Carlito Galvez Jr. pabor sa rekomendasyon sa Agosto o Setyembre an burokasan nin klase sa sunod na school year alagad magdedepende man giraray ki Presidente Duterte.

Si mga lugar o barangay na mayong caso kan virus pig-andaman kan DepEd Bicol an face-to-face classes, alagad sagcod sa ngunian dai pang kasegurasyon si Secretary Briones kun nuaarin ibabalik, sabi pa kan DepEd Bicol.

Dakul nang mga Parent Teachers Association (PTAs) an nagpapabor sa pagbuelta kan mga estudiantes sa classroom mantang an ibang magurang daing gayo natatawan nin atensyon an pag-adal kan saindang mga aki huli ta prioridad an pagpadagos kan hanap buhay.

Apektado an mga estudiante sa blended learning kabale na si yaon sa online classes na kadakle kan panahon maluya an serbisyo kan internet nadag-dagan pa kan mga brownout sa mga cooperativa nin electricidad, dakul an reclamo kan mga estudiante asin maging sa modular learning.

An DepEd nagkumfirmar na dakul na mga estudiante an apektado kan blended learning bakong arog sa classroom na saindang na-aatubang an mga paratukdo.

An suporta kan magurang sa pag-adal kan saindang mga aki makakatabang sa tahaw kan dai nagbababa an caso kan Covid-19 dawa na ngani igwa nang mga natutudokan nin bakuna.
(Melvin F. Barayoga, RPN DZKI Iriga OIC)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -