GENERAL SANTOS CITY—GIKUMPIRMA ni Joint Task Force Central ug 6th ID Commander Major General Cirilito Sobejana nga extortion ug pagpanimalos sa BIFF ang motibo sa natigayong pagbusikad sa Isulan, Sultan, Kudarat partikular na sa Carlito’s Chicken House nga nahimutang sa National Highway, Barangay Kalawag 2, alas 3:15 sa hapon kagahapon.
Nasayran nga mokabat sa 18 ka inidbidwal ang naangol sa pagbusikad sa improvised explosive device o IED asa duha sa mga samaron ang daling gipailalom sa operasyon samtang ang uban nakahiagom og minor injuries.
Matud pa ni 6th Infantry Division Spokesperson Major Arvin Encinas, narekober sa EOD teams sa blast site ang mga tipaka sa 9v battery, cellphone, concrete nails ug uban pa.
Subay niini, nagpaabot sa iyang pakigsimpatiya ang opisyal sa mga biktima sa maong insidenti.
Gihingusgan sa opisyal nga usa ka “barbaric act” ang mga nagpaluyo sa maong insidente ug gipaniguro nga manubag ang mga responsable.