Naaprubahan hangtud sa ikatuyo sanan pinal na pagbasa atul sa pinakauna na Regular Session nan konseho sa ciudad kuman tuig 2021 na taghimo online, ENERO 5, 2021 an isa ka Amendatory Ordinance sa Ordinansa Numero 407 serye sa 2018, an tagtawag na ‘PLASTIC ORDINANCE’, na epektibo na nagpadelatar pa nan dugang 6 ka buyan sa implementasyon sa PAGDILI na sa paggamit nan plastic cellophane, plastic straws sanan styropor. An Amendatory Ordinance tagduso nan Committee on Environmental Protection sa pagpanguyo ni Konsehal Sebastian Ric Nagas nunot sa hangyo nan Surigao Chamber of Commerce and Industry.
Hinuon waya kadali an pag-apruba human nga nagpabati nan ila mga barugganan an pipila ka mga konsehal pareho kan Atty. Cacel Azarcon sanan Atty. Noel Christian Toti Catre Jr. na taglaong ni konsehal Azarcon dili nija madawat an rason sa hangyo nan SCCI na maalkanse sila kay jaon pay ila stock nan plastic cellophane na ila pa gusto na mahidispatsar.
Nuabot sa pagbotohay an pagkaapruba sa IKADUHANG PAGBASA na miresulta sa 6 ka pabor sa rekomendasyon 3 an waya magpabor sanan isa ka abstention. Sa ikatuyo sanan pinal na pagbasa waya nay nopabati nan pag-alkontra hinungdan sa hingpit na pagpasa sa amendasyon para sa City Ordinance 407 serye sa 2018. An plastic cellophane bag pwede pa maggamit subay sa amendment sugod Enero 5 taman Hunyo 30, 2021.
(Jhino Parrucho, Ronda 10 RPN DXKS Surigao)