Gilantaw nga mas mapalig-on pa ang kampanya sa kagamhanan sa dakbayan sa Cagayan de Oro kontra Covid-19.
Kini human hiniusang giuyonan sa konseho sa syudad sa miaging sesyon nga gidumala ni bise mayor Kikang Uy ang ordinansa nga naghatag og katungod ni Mayor Oscar Moreno pagpirma sa Deed of Donation tali sa Northern Mindanao Medical Center (NMMC) ug Department of Health (DoH).
Ang maong donasyon naglangkob sa loteng gipanag-iyahan sa dakbayan dinha sa barangay San Simon nga adunay gilapdon nga 25 mil metros kwadrado lakip na ang gitukod nga mga kalambuan aron magamit nga Emerging and Re-Emerging Infectious Disease (EREID) Facility ug nganlan og NMMC-CDO Medical Complex.
Tinguha niini nga matubag ang nagkataas nga pagpanginahanglan sa pandemyang dala sa Covid-19.
Gibutyag nga ang maong lakang makatabang nga mapalig-on ang pagtambayayong sa dakbayan ug nasudnong kagamhanan pinaagi sa NMMC ug DoH sa natad sa panglawas ug hospital services.
Ang lakang nunot sa palisiya sa kagamhanan sa dakbayan nga isalig sa siyensya ug mga eksperto sa medisina ang pagbuntog sa virus.
Niini, ang operasyon sa EREID facility pangunahan na sa NMMC ug DoH ug mapadali ang pagpatuman sa gipangandoy sa dakbayan nga makabaton og Training and Research Center for the cure of Infectious Diseases.
Dili lang Covid-19 ang matabangan sa maong facilidad kun dili mga umaabot pang sakit aron mapakgang sa daling panahon ang pagkuyanap niini, pamahayag ni bise mayor Kikang Uy. (SP)