Sugod nang gipatuman sa kagamhanang lokal ning dakbayan ang “Environmental User’s Fee (EUF) og ubang balayronon dinha sa mga pasilidad sa mga giilang Eco-Tourism Sites, dinhi palibot sa dakbayan.
Kining maong kalamboan ang nasayran gikan sa buhatan sa City Treasurer, kinsa maoy magdumala kalabot sa pagpatuman niini.
Sigun sa gikompirmar ni OIC City Treasurer, Hermie Sabando, nga ang pagpatuman niini nagasugod na kaniadtong Marso 9, 2021.
Dugang usab nga gibutyag niini, nga ang pagpatuman sa EUF dinhi sa dakbayan ang gipalig-on pinaagi sa Ordinansa No. 20-305, o giilang “The Dipolog City Environmental User’s Fee Ordinance” nga napanday sa Sangguniang Panlungsod og na-aprobahan niadtong nakalabay nga Setyembre 21, sa nakalabay’ng tuig, ilawom sa pagpangamahan ni konsehal Eduardo C. Baron.
Sigun sa unod sa maong ordinansa, nga ang EUF ang paga-kolektahon sa mga otorisadong kolektor gikan sa mga turista, bakasyonista, bisita ug ubang katawhan dinhi sa dakbayan dinha sa mga gi-designar sa dapit nga gipahimutang dinha sa mga gangha-an o entry points sa tanang mga giilang Tourism Sites dinhi sulod sa hurisdiksiyon sa Dipolog, partikular na ang A) 3,003 Steps Linabo Peak, ug B) Sungkilaw Falls.
Dugang usab nga gipaklaro ni Treasurer Sabando nga ang katuyu-an sa paglikom og dugang pondo sa dakbayan pinaagi sa EUF, ang paga-gamiton ra usab dinha sa pagmintinar, pag-paayo ug sa pagpa-anindot sa mga nahisgotang Tourism Sites.
Sa matag kantidad sa tickets nga nagtakda og balayranan sama sa: 10 pesos alang sa kabata-an (gikan 17 anyos, paubos) ug 20 pesos (gikan 18 anyos, pataas).
Samtang alang sa Parking Fee dinha sa mga nahisgotang dapit, ang balayranan pinaagi gihapon sa ticket mao ang Motorsiklo (5 pesos), Motorcab / tricycles (10 pesos), Four-wheeled vehicles (20 pesos) ug six-wheeled vehicles, pataas (35 pesos).
Dugang usab nga gipaklaro sa tinubdang buhatan nga sa matag kantidad sa ticket, katunga niini kon 50% ang mapunta ngadto sa panudlanan sa dakbayan, samtang ang nahibiling 50% ang mapunta usab ngadto sa panudlanan sa Barangay diin ang tourism Site nahimutang.
Ilawom sa maong ordinansa, gihatagan sa “exemption” wala gilakip ang mga A) Senior Citizens ug Persons with Disability (PWDs) sa pagbayad sa EUF, basta mopakita lang kini sa ilang identification cards, B) mga kabataan nga nag-edad Dos anyos paubos, C) mga Environmental Science Researchers ug D) mga Diplomats ug ubang bisita sa kagamhanang lokal sa Dipolog.
Sigun sa dugang nasayran nga ang pagpadas-ug ning nahisgotang ordinansa ang gihimo gumikan sa mga rason nga kini ang nagbaton sa potensiyal isip usa sa mga Tourist destinations dinhi sa atong lalawigan, busa kini ang angayan nga palambo-on ug i-mintinar sa atong kagamhanang lokal, uban sa pagseguro niini nga kining mga giilang tourist sites ang ma-palambo ug mapanalipdan gikan sa kadaut.
Matud pa nga kining ordinansa ang gipadas-ug subay usab sa gitugot sa seksiyon 129 ug 186, sa atong Local Government Code, nga naghatag og patugot ug gahum sa mga kagamhanang lokal sa paghimo og dugang kakitaan pinaagi sa buhis, ilabi na kadtong wala nahilakip sa National Revenue Code, basta ang singilan ang dili lang maghinobra ug makatarunganon ngadto sa mga katawhan.
(City Information Office-afb)
