General Santos City – Ubos sa pamunoan ni General Santos City Mayor Lorelie Pacquiao, nilambo na usab ang ekonomiya sa dakbayan niadtong 2023, diin nisaka og 2.4% ang Gross Domestic Product (GDP).
Sumala sa Philippine Statistics Authority (PSA), ang GDP sa siyudad sa 2023 moabot sa PhP 132.17 bilyon gikan sa PhP 129.03 bilyon sa 2022.
Mapasigarbuhon si Mayor Pacquiao sa mga positibong resulta nga nahitabo ubos sa iyang administrasyon, nga iyang gikonsiderar nga pruweba sa malampusong mga palisiya ug proyekto nga iyang gipatuman alang sa mas paspas nga paglambo sa ekonomiya sa General Santos.
Sumala sa PSA, ang GDP sa siyudad niadtong 2023 niabot sa lebel nga mas taas kaysa pre-pandemic figure nga PhP 121.48 bilyon.
Sa mga sektor sa industriya, ang pinakadako nga nakakuha mao ang sektor sa accommodation ug food service activities nga misaka og 20.1%, ug transportasyon ug storage nga adunay 17.5%.
Samtang, ang mga sektor sama sa manufacturing ug agriculture, forestry, ug fishing nakasinati og pagkunhod sa 18.0% ug 4.3%, sumala sa PSA.
Bisan pa sa mga hagit, gipasigarbo ni Mayor Pacquiao ang iyang mga lakang aron mapausbaw ang lokal nga ekonomiya ug gipasalig ang padayon nga suporta sa sektor sa negosyo ug komunidad.
Ang kalampusan ni General Santos, sumala pa niya, usa ka pruweba sa iyang liderato ug epektibong panagtambayayong sa gobyerno ug pribadong sektor sa pagkab-ot sa kalampusan. (Rem Agdon)
(Source: CMO)