Gikatakdang buksan na sa publiko ang ECO Park nga nahimutang sa kanhi basurahan sa may Upper Dagong, barangay Carmen karong umaabot kapistahan ni Sr. San Agustin sa Agosto 28, 2021.
Gipasabot ni Engr. Armen Cuenca, hepe sa City Local Environment and Natural Resources Office, nga Phase 1 pa lamang sa Eco Park ang buksan sunod bulan nga naglangkob sa rotunda, bike and jogging lane, lakip ang amphitheater niini.
Dugang pa ni Engr. Cuenca nga ang Eco Park gisugdan pag-develop human hingpit nga nasirad-an ang open landfill niadtong Abril 2017 sa paningkamot sa administrasyon ni Mayor Oscar Moreno ug pag-abag ni Vice Mayor Kikang Uy ug majority bloc sa konseho.
Lakip sa mga attraction sa Eco Park, kung hingpit na kining matibawas, mao ang butterfly garden, lagoon, picnic/food area, adult/children playground ug daghan pa.
Subay niini, malaumon ang CDO-LGU nga ipailawom na sa Modified Community Quarantine ang Cagayan de Oro atol sa kapistahan.
(ACM, photo courtesy by Jomar Figuracion | City Information Office)