Cebu City – Gi-angkon ni Cebu Vice-Governor Hilario Davide III nga siya ug ang kampo sa Barug Alang sa Kauswagan ug Demokrasya (Bakud) Party nagka istoryahay na labot sa umaabot nga 2022 elections.
Naila si Davide nga ka alyado sa pamilyang Durano kinsa maoy nagpadagan sa Bakud Party sa fifth district sa Probinsya sa Sugbo.
“We have been kuan (nag istoryahay) but wala pa gyud ang desisyon,” matod ni Davide.
Dunay mga taho nga boot magpa re-elect si Davide sa sunod tuig nga piniliay, pero dihang gipanguta unsa ka tinood, nag dumili si Davide pag tubag, ug giingnan lang ang mga sakop sa media nga magpa abot sa iyang pag anunsyo.
Gi-angkon hinoon, ni Davide nga gihangyo siya sa mga Duranos nga mag runningmate ni kanhi Tourism Secretary Joseph “Ace” Durano kung mo hukom kini pagdagan pagka gobernador sa 2022 elections.
“Paabota na lang ang announcement ana ha, mo announce ra mi unya, mo announce ra unya ko. I’ll just make announcement later paabota lang ang October,” pasabot ni Davide ngadto sa mga reporters.
Sa miaging semana, gipahibaw sa Bakud Party nga si Durano nagtinguha nga modagan sa pagka gobernador sa 2022 elections.
Gibutyag sa Bakud Party nga lakip sa mga gi konsidera ni Durano mao ang iyang runningmate sa dili pa kini mohimo sa iyang final nga desisyon.
“Ace has one person in mind, who shares the same values and kind of leadership as him. There are still ongoing discussions, but if this person agrees to run with him, the it would be a much easier decision for Ace,” butyag ni kanhi Kongresista Ramon “Red” Durano VI, presidente sa Bakud Party.
Si Davide, nagsilbi nga gobernador sa duha ka termino gikan sa 2013 hangtud sa 2019, midagan pagka bise gobernador niadtong 2019 ug midaug ubos sa Liberal Party.
(Source: Barug Alang sa Demokrasya ug Kausaban (Bakud) Party, photo courtesy of Ace Durano Facebook page)