Aprobado na sa Sangguniang Panlalawigan sa probinsya sa Sarangani ang dungag ₱ 68.8 Milyon ka pesos nga pondo alang sa padayong pakigbatok sa Coronavirus ug sa ubang emergency responses ug laing pondohanan sa Provincial Government sa Sarangani.
Niaging adlaw nga Martes sa sesyon sa Sangguniang Panlalawigan, giduso ni Board Member Joseph Calanao, chairman sa komitiba sa finance, ang gi-certify urgent ni Governor Steve Chiongbian Solon nga supplemental budget alang sa maong katuyuan, ug kini ang giuyunan tanan sa mga board member sa pagpanguna ni Vice Governor Elmer De Peralta, sa pagsuporta nila Senador Manny ug Congressman Ruel Pacquiao.
Sa talaan sa Department of Health, saysentay syete (67) na kabuok mga taga-Sarangani Province ang naka-recover ug nanga-ayo sa COVID-19. Buot pasabot niini, unom (6) na lang karon ang nagpabilin nga active cases sa Sarangani gikan sa setentay tres (73) total cases.
Apan wala gihapoy pagkumpyansa gumikan daghan pang gaabot nga mga LSI/ locally stranded individual ug Returning OFW, ug ang gikabalita nga local transmission sa mga katapad lugar.
Ang maong pondo ang gitagana sa pagpalit og dungag pa nga mga medical ug laboratory equipment and supplies para sa Sarangani Provincial Hospital nga nagsilbi nga provincial COVID isolation facility ug alang usab sa lima (5) ka municipal hospital sa Sarangani Province.
May mga dungag bitamina ug tambal paliton ang opisina ni Provincial Health Officer Dr. Arvin Alejandro nga makatabang sa pag-ayo sa mga adunay sintomas sa Coronavirus Disease, alayon sa rekomendasyon sa FDA kon Food and Drug Administration of the Philippines.
Mudungag palit og mga PPE suit alang sa padayong proteksyon sa mga medical frontliner ug sa mga responder nga gasundo sa mga LSI ug OFW. Dugangan ang mga kagamitan sa komunikasyon mga hand held radio sa lagyong dapit aron paspas malabay ang mga impormasyon.
Dugangan pud ang suplay sa RT-PCR test kits ug ang bag-ong version sa rapid test nga gi-rekomenda sa WHO/World Health Organization gitawag nga Antigen. Magpadayon usab ang mga pagpa-training sa mga medical frontliner hilabi na ang mga med tech, nurse ug myembro sa epidemiology unit aron mahan-ay ang mga bag-ong direktiba sa DOH ug WHO.
Samtang, gipaigmat karon ang mga taga-Sarangani Province sa pag-adto sa fishport sa Gensan gumikan nasuta nga may mga natakdan sa Coronavirus nga adunay exposure sulod sa fishport. Gani, ginatun-an ang pagpailalum og temporary shutdown na sa Gensan Fishport, temporaryong pagsirado sa Market 1, Market 2 ug Market 3.
Padayon lang ang panawagan ni Governor Solon kauban ang pito (7) ka mayor ug si Assistant Provincial Administrator Engr. Gerald Faciol, nga muduol ang mga tao sa ilang barangay health center ug municipal-provincial hospital kung adunay gibatyag sa lawas aron dayon ma-ayudahan. Tungod sa gikataho nga local transmission sa mga kasikbit dapit, dili layo nga posibleng matakdan sa Coronavirus pinaagi sa gikaingon nga hangin o dili ba kaha sa pagdikit sa lawas kung anaa sa pampublikong lugar nga dili matuman ang dos metros (2m) physical distancing, pagsuot og face shield ug face mask ug ang pag-alcohol-pagsabon sa mga kamot.
(Jake Narte, Provincial Government Office – Public Information Office Sarangani)