Human nasuta nga adunay 16 ka mga nagpositibo nga baboy sa African Swine Fever (ASF) sa probinsya, dali nga nagpahigayon og depopulation activities ang Provincial Veterinary Office (ProVet) uban ang mga Municipal Agriculture Office ug Barangay LGU’s.
Gumikan niini, wala gipasagdan sa panggamhanan sa probinsya ang mga apektadong mag-uuma nga wala ma-rehistro ang mga binuhing baboy sa Philippine Crop Insurance Corporation (PCIC) pinaagi sa paghatag kanila og financial assistance (indemnification) balor 2,000.00 matag-baboy nga e-cull.
Php 66,000.00 ang nadawat sa 11 ka mga mag-uuma sa Kiraging, Sugbongcogon nga adunay 33 ka mga baboy, samtang Php 2,000.00 alang sa 1 ka baboy gikan sa Silad, Sugbongcogon ug ₱ 30,000.00 alang sa 15 ka mga baboy sa 4 ka mga apektadong mag-uuma sa Salay River 2, munisipyo sa Salay.
Sa kinatibuk-an, mokabat na sa ₱ 3,848,000.00 indemnification gikan sa panudlanan sa probinsya ang nadawat sa 716 ka mga apektadong mag-uuma alang sa 2,645 ka mga baboy.
Tungod sa nabating kalisod sa katawhan gumikan sa padayon nga hulga sa COVID-19 ug ASF, wala mihunong si Governor Bambi sa pagpaabot og tabang ngadto sa katawhan kay pinaagi niini, maminusan ang kalisod nga ilang nasinatian ug kapit-os nga gisagubang.(Provincial Veterinary Office)