Opol, Misamis Oriental – Nakumpiska sa kapulisan ang duha ka Isuzu Elf trucks nga gikargahan og 183 ka sako sa gituohang ilegal nga mineral ores atol sa operasyon nga gipahigayon kagabii, Setyembre 27, 2025, sa Barangay Limonda, Opol.
Base sa taho nga nadawat sa Opol Municipal Police Station gikan sa usa ka kompidensyal nga impormante, adunay giingong ilegal nga kalihokan sa pagmina sa maong lugar. Dayon nga mipahigayon og operasyon ang mga sakop sa Opol PNP pinangulohan ni PMAJ Teodoro Panganiban De Oro, Hepe sa Opol Police, uban sa Provincial Task Force nga gipangulohan ni PMAJ (Ret.) Allan Payla ubos sa direktang pagdumala ni PMAJ (Ret.) Rogelio Labor, kauban ang Provincial Mobile Force Company nga gipangulohan ni PLTCol Denver M. Vergara.
Sa pag-abot sa mga otoridad, nadiskobrehan ang duha ka Isuzu Elf trucks nga nagkargaha og mineral ores nga walay kaukulang dokumento. Gimbentaryo kini ni PSSg Carl A. Reyes sa presensya ni Hon. Jenalyn Lacdagan, konsehal sa Barangay Limonda, isip insulating witness.
Gibanabana nga nagkantidad og Php 269,000 ang nakumpiskang mineral ores. Ang mga sakyanan ug kargamento karon anaa na sa kustodiya sa Provincial Task Force alang sa tukmang disposisyon.