Naka-recover na ang duha (2) ka kaso sa Delta variant sa COVID-19 sa probinsya sa Sarangani. Kini ang gibutyag ni Provincial Health Officer Doctor Arvin Alejandro. Gikumpirma usab kini sa Department of Health Region 12 human nag-negatibo na ang repeat RT-PCR swab test result sa duha pagsiguro nga wala na silay dalang virus sa lawas.
Segun ni Dr. Alejandro, bag-uhay lang niabot ang resulta gikan sa Philippine Genome Center duha (2) ka semana human gipadala ang sample didto kanila sa kauluhang Maynila.
Bag-uhay lang nigawas ang resulta timing sa pagka-full recovery na usab sa duha. Gi-angkon ni Dr. Diomedes Remitar, ang municipal health officer sa munisipyo sa Malapatan nga walay history of travel nga nakagawas sa Region 12 ang taga-Malapatan nga naka-recover na karon sa Delta variant. Usa kini ka babae, anaa sa hamtong ang pangidaron. Gaadtuan sya sa mall sa dakbayan sa Heneral Santos ug nakatambong og kasal sa Kawas, Alabel una nakasinati og mga sintomas.
Samtang, ang laing kaso, usa ka seaman, nag-proseso sa iyang mga dokyumento didto sa Maynila. Didto kini na-swab test sa Maynila apan ngalan nga taga-Sarangani sa Sarangani Province kini nalista nga natakdan sa Delta variant.
Gibantayan kini nga Delta variant nga unang nadiskubrehan sa nasud India tungod sa impormasyon sa mga eksperto nga mas makatakod kini nga klase sa Coronavirus. Gani, libuan na ang nangamatay sa India ug ubang kanasuran gumikan ani nga Coronavirus mutation.
Gitudlo usab nga hinungdan sa pagsutoy karon sa gidaghanon sa mga nangatakdan entiro Pilipinas ang Delta variant nga nakasulod na sa halos tanang rehiyon. Una nang gibutyag ni Governor Steve Chiongbian Solon nga ma-orihinal man nga strain sa Coronavirus o mga variant niini, angay matud pa ikonsidera ang tanan nga “highly infectious” o labing makatakod aron padayong managana ang katawhan sa pagtuman sa mga personal safety protocol.
Sayo magpabalo sa mga gibati samtang matambalan pa ang mga sintomas. Gani, daghan man ang naka-recover. Suportado usab kini nga mga lakang sa pito (7) ka mayor, nila Vice Governor Elmer De Peralta, tanang board member ug nila Senador Manny ug Congressman Ruel Pacquiao. Sa pagkakaron, puno ang mga hospital sa Sarangani ug Gensan.
Sa talaan sa DOH, as of September 5, nag-una ang South Cotabato nga adunay pinakadaghan karon sa aktibong kaso sa COVID-19 anaa na sa 1,433 kabuok. North Cotabato 1,358, ang Gensan 942, Sarangani 685, ug Sultan Kudarat 541. Ang patay, 373 kabuok gikan tanan sa South Cotabato, 350 taga-Gensan, 331 taga-North Cotabato, 136 ang patay gikan sa Sultan Kudarat, ug singkwentay tres (53) sa Sarangani.
Ang lungsod sa Malungon ug Alabel ang nakatala karon og labing daghang active cases sa COVID-19 sa probinsya sa Sarangani, ubay-ubay pa pud sa Glan, Malapatan, Maasim, Kiamba ug Maitum. Daghan ang mailad sa ordinaryong flu versus COVID-19 tungod pareho lang ang mga pasiunang sintomas. Apan magkadugay kung pasagdan, mupadulong sa pneumonia hangtud maglisod na sa pagginhawa.
Gawas na lang sa mga pasyente nga asymptomatic, walay sintomas apan anaa sa ilang lawas ang virus. Dili na muadto og opisina o mugawas sa balay kung may hilanat, ubo ug sip-on, inay mag-inisyatibo sa pag-home quarantine aron dili manakod samtang magpabalo sa barangay o munisipyo aron matabangan sa libre nga swab testing ug uban pang panginahanglanon.
(Source: PIO-SARANGANI)