Pinasingkedan ni Bise Mayor Erdi Valenzuela ti ili a Dingras nga adda ti ordinansa nga inpasa ti Sang. Bayan a mangipawil kadagiti daga-daga a makinaria ken kagamitan a pagtalon a dumalan iti kalsada.
Nupay kasta, linawlawaganna a saan nga amin a makinaria a pagtalon ket maipawil a maidalyasat iti sakop ti ili a Dingras.
Imbatadna a nakitinnulong dagiti kameng ti Philippine National Police iti pannakaadal ti nasao nga ordinansa.
Segun kenkuana, inpakaammo dagiti otoridad a naruay nga aksidente ti napasamaken iti ili a Dingras a gubuay iti panagdalyasat dagiti nasao a klase ti makinaria iti kalsada.
Inbunannagna a dagiti nasao a makinaria ken kagamitanket manggubuay iti panaggalis dagiti kalsada no kagapgapoda iti kataltalonan.
Mainaig iti daytoy, kuna ni Valenzuela a mabalin a dumalyasat dagiti nasao a makinaria kas iti tractor ken kuliglig iti kalsada no madalusan nga umuna dagiti ligayna.
Impalgakna nga asino man nga aglabsing iti nasao nga ordinansa ket mamulta iti dua ribu lima gasut a pisos.
Iti baet daytoy, inlawlawag ti bise mayor a dagiti laeng kameng ti PNP ti mabalin nga agtiliw. (Ronald Domingo, RPN DZRL Batac)
(Source: LGU – Dingras, Ilocos Norte)