Umabot iti dua gasut ket lima a kakailian ti natiliw dagiti otoridad a naglabsing kadagiti “health protocol” itay napalabas a lawas.
Basar iti data a pinaruk-atan ti Ilocos Norte Police Provincial Office wenno INPPO kaaddoan a natiliwan dagiti saan a nagusar ti “face mask” nga immabot iti sanga gasut sangapulo ket walo, sumarsaruno dagiti naglabsing iti curfew nga immabot iti tallopulo ket tallo ken maikatlo a kaaddoan dagiti naglabsing iti social distancing nga immabot iti duapulo ket walo
Kabayatanna, kadagupan dagiti Local Government Units wenno LGU’s, kaaddoan ti natiliw ti siudad ti Laoag nga immabot iti limapulo ket maysa, sumarsaruno ti ili a Badoc ken ti ili a Piddig nga agpada nga immabot ti duapulo ket lima dagiti natiliw ken ti siudad ti Batac ken ti ili a Marcos ket immabot met iti sagdu-duapuloda ti natiliwanda.
Ballaag kadagiti agtultuloy a mangisaysayangkat ti “social gatherings” wenno panaguumong dagiti naruay a tattao kas iti panagisayangkat ti pasken kalpasan nga adda ti tallo a natiliwan iti siudad ti Batac idinto a ditoy siudad ti Laoag ket adda ti natiliw a siyam a naglabsing iti “unauthorized travel business”.
Naammoan nga adda pay ti naglabsing ti liquor ban a walo iti siudad ti Laoag, lima ti ili a Piddig ken maysa ti ili a Currimao.
(Source: Provincial Government of Ilocos Norte – Communications & Media Office)
