TAGUM CITY – SIYAM ka mga suspek ang nasikop ug nadeskubre ang usa ka drug den atol sa gilusad nga sunod-sunod nga drug bust sa hiniusang puwersa sa kapulisan sa Davao Region ug sa Philippine Drug Enforcement Agency (PDEA) didto sa Tagum City.
Sumala ni Police Regional Office (PRO) 11 spokesperson Chief Inspector Milgrace Cajes Driz nga resulta kini sa mas gipakusgan nga kampanya sa pagbatok sa ilegal nga druga sa rehiyon ubos sa pamunoan sa bag-ong PRO-11 director Chief Supt. Marcelo Morales.
Gipang-ila ni Driz ang mga suspek nga gikonsiderang mga High Value Targets (HVTs) nga sila Joey Lusag Villanueva, Rowena Actub Demetria, Jesson Cirunay Montellamo, Janneco Jae Abrencia Barroquina, Rommel Semblante Abellon, Manuel Aporbo Jr., ug Bienvenido Basalan Quilario… Segun ni Driz nga si Rowena Actub Demetria ang nahimong caretaker sa nasampit nga drug den nga maoy gihimong luwas nga balay alang sa ilang ilegal nga aktibidad sa mga suspetsado.
Ang mga nahisgutan pulos hamtong diin nakuha sa ilang posisyon ang 10 gramos nga gituohang shabu nga mokantidad og P120,000 ug mga drug paraphernalia sud sa usa ka balay nga gihimo nilang salag sa pag-pot session ug pag-repack og druga sa Teachers Village, Barangay Magugpo South, Tagum City.
Sa samang adlaw, sikop sab ang laing duha ka suspek nga sila Andy Valderama Lara ug usa ka Omar Oliva Diama, didto sa Purok 6, ug Purok 1-A, Barrio Site, Barangay San Miguel, Tagum City diin nakuha sa ilang posisyon ang 2 gramos nga shabu nga dunay street value nga P24,000… MAng mga ebidensya gipailawom na sa laboratory examination samtang ang mga dinakpan gipangbalhog na sa prisohan diin kasong pagsupak sa Republic Act 9165 kon Comprehensive Dangerous Drug Act of 2002 ang ipasaka nga kaso sa mga nahisgutan.