Nakaandam matod pa ang Bureau of Fire Protection-GenSan nga motunol og assistance sa pamilya sa napatay nga motorista, human malambigit sa aksidente atol sa gipahigayong motorcada, dungan sa kickoff sa Fire Prevention Month campaign.
Matod pa ni BFP-GenSan spokesperson SFO1 John Oliver Alfeche, sa kasamtangan, ilaha unang gitugyan sa Traffic Management Unit ang ginahimong imbestigasyon sa insidente.
Butyag pa sa opisyal, ilahang gikasubo ang nahitabo, asa nailhan ang biktima nga si Neceforo Pulvinar Jr., residente sa Purok Matinabangon, sakop sa Brgy. Labangal.
Angkas sa biktima ang misis niini sa dihang mahitabo ang insidente, kansa, masuwerteng naluwas ang ginang.
Dugang pa ni Alfeche, dakong tabang sa ginahimong imbestigasyon sa TMU ang kuhang dashcam video sa usa ka sakyanan nga nagsunod sa traffic flow niadtung higayona.
“Sadly, naay nahitabo and so far ginaimbestigahan pa man. May nag-circulate man nga video regarding sa nahitabo. So far, under investigation pa namo,” ang tipik sa pamahayag sa opisyal. (John Rey Somido)