Gipalig-on sa lokal nga panggamhanan sa Dapitan ang programa sa panginabuhian sa Barangay Potol human malampusong madala ang 273 ka sisiw sa pato gikan sa Molave alang sa balut production project.
Gisiguro sa LGU Dapitan ang hapsay ug luwas nga transportasyon sa mga sisiw pinaagi sa ilang transport services, nga nakatabang aron maabot kini sa maayong kahimtang ug andam na alang sa EGBU SLPA Balut Production project sa barangay.
Kini nga inisyatiba kabahin sa padayon nga paningkamot sa administrasyon ni Mayor Belen Uy sa paghatag og lig-on ug malungtarong panginabuhian sa mga komunidad.
Si Jezer O. Adasa, presidente ug barangay coordinator sa programa, mipadayag og pasalamat sa mayor sa iyang suporta ug pagpalihok sa maong proyekto nga naghatag og dugang oportunidad sa mga residente.
Gilauman nga ang balut production project makahatag og dugang kita sa mga lumulupyo sa Barangay Potol samtang ginapalambo ang lokal nga produksyon ug negosyo sa siyudad.(IKEN B. GULLEM)
Source: City Government of Dapitan