30.9 C
Manila
Friday, March 29, 2024

DOH ARD Mikurtesiya Ni Mayor Uy, Kahimtang Sa COVID-19 Ug Routine Immunization Gituki

- Advertisement -

Padayon karon ang pag-monitor sa Department of Health (DOH) kabahin sa padayong pagpatuman sa routine immunization dinhi sa Rehiyon 9 taliwala sa gi-atubang karon  nga pandemya.

Kini ang nasayran human mikurtesiya ang mga personahe sa nasangpit nga ahensiya ngadto ni Mayor Darel Dexter T. Uy niadtong Agosto 18 ning tuiga, sa may kapin kon kulang alas 10:00 ang takna sa buntag didto sa buhatan niini.

Nasayran nga sila si DOH Assistant Regional Director, Dr. Augusto Manolo Alpichi, Dr. Mamat Cham sa World Health Organization (WHO) ug Ms. Justine Legaspi kauban sa ilang team ang karon nagpahigayon og monitoring ug surveillance sa mga  “notifiable diseases” sama sa measles ug polio lakip na ang Covid-19, dinhi sa tibuok Rehiyon.

Atol sa nasangpit nga kurtesiya, natuki ang mga importanteng detalye kabahin na sa gipahigayong vaccination program, ang kahimtang sa mga health workers ug ang estado sa routine immunization dinhi sa dakbayan.

Si Mayor Uy mibutyag nga ang lokal nga kagamhanan sa Dipolog kanunay nga nangandam aron malikayan o kapugngan ang pagsulod sa Delta variant ug uban pang mga variants sa Covid-19 dinhi sa dakbayan.

Sumala usab ni Alpichi, base sa mga datus nga nakita sa talaan sa DOH, nakitang maayo ang implementasyon sa dakbayan sa Dipolog sa routine immunization ug vaccination programs niini.

Samtang malipayon usab nga gibutyag ni Dr. Jane Jaug sa Provincial-DOH nga niadtong Agosto 17, nag zero case ang Dipolog sa Covid-19, uban sa pagpanghinaot nga magapadayon kining maong kalamboan ug wala na unta’y mabiktima pa sa Covid-19 sa mga umaabot pa nga mga panahon.

(Source: CITY INFORMATION OFFICE| DIPOLOG CITY GOVERNMENT Facebook page)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -