Cagayan de Oro – GIKLARO sa buhatan sa City Health Office kon CHO nga wala pa’y kaso sa Nipah Virus nga nakasulod sa Pilipinas ilabina sa dakbayan sa CDO.
Kini human pipila ka mga pribadong tunghaan ang mibalik sa online clases tungod sa dungan dungan nga pagsakit sa mga magtutungha.
Una kining namatikdan sa tunghaan sa Ateneo De Cagayan – Xavier University nga nakaalarma sa mga estudyante, magtutudlo, ug ginikanan.
Sa gipagawas nga statement ni CHO Head Dr. Rachel Dilla nakigkoordinar sila sa buhatan sa sa regional health Office aron masiguro nga wala pa makasulod ang nahisgutang virus.
Ang maong mensahe gisupportahan usab sa department of health sa rehiyon 10 atol sa gipahigayong press conference bag-ohay lamang.
Matud ni Dr. Ellenita Gamolo ang OIC Director IV DOH 10 nga Influenza Like Illness ang kasagara nga nasinatian karon sa katawhan o mas makompara kini sa Flu o hilanat. ug giklaro niini nga FAKE NEWS ug Misinformation ang mikatap sa social media nga adunay Nipa Virus sa syudad sa Cagayan de Oro.
Bisan paman niana, mibalik gihapon ang pipila ka mga tunghaan ang online class sa pagpangandam ug pagpanalipod na usab sa ilang mga magtutungha sa bisan unsang balatian nga makuha sa gawas. Ang maong mga eskwelahan naglakip sa Ateneo de Cagayan University, Liceo de Cagayan University, Corpus Christi School, Lourdes College, ug University of Science and Technology of Southern Philippines.
Dugtong sa maong kabalaka, Mipagawas ug bag-ong mando si Cagayan de Oro City Mayor Rolando Klarex Uy, pinaagi sa Executive Order No. 290 ug ang Provincial Health Office sa Misamis Oriental nga sundon ang minimum public health standards sa tanang pampublikong lugar ug transportasyon. Kini aron mapugngan ang pagdaghan sa mga nakasinati og influenza-like illness (ILI) o hilanat, ubo ug sip-on.
Ilang gidasig ang katawhan sa pagsul-ob og face masks, pagsunod sa social distancing sa tanang pampublikong lugar, pagsunod sa saktong handwashing, ug saktong cough etiquette.
Written by Cheleste Simene
Photo courtesy of DOH 10