Cagayan de Oro City – Ang disiplina nagpabiling nag-unang susi pagpakgang sa pagkuyanap sa 2019 coronavirus disease (Covid-19). Mao kini ang gisugilon ni Dr. Belinda Lim, health cluster manager sa Iligan Emergency Operations Center (EOC) sa usa ka virtual press briefing.
Matud niya ang bugtong paagi sa paghinay sa takod sa COVID-19 mao ang pagsunod sa katawhan sa strikto nga pagtuman sa health and safety protocols.
Si Dr. Lim nagsugilon nga ang pagkuyanap dali sa virus sa dakbayan sa Iligan nagsumikad sa wa pagsunod sa katawhan sa insaktong health protocols sama sa pagsul-ob sa mask ug pagtuman sa physical ug social distancing. Matud niya, nga daghan ang giatubang nila sa EOC nga mga hagit apan ang pagpatuman sa katawhan sa strikto nga health protocols ang nagpabiling dako nilang hagit.
Mao nga nanawagan si Lim sa mga Iliganons nga magpakabana. Likayan ang panagtapok, healthy lifestyle ipalambo. Siya nagpahinumdum usab sa pagsunod sa minimum health standards.
Sa pagkutlo ning maong taho sa miaging adlaw, ang EOC nakakuha sa record nga 626 confirmed COVID-19 positive diin 150 ang aktibo niini. Ang city’s recovery rate anaa sa 71.40% or 447 cases samtang ang case fatality rate anaa sa 4.63% o 29 cases.
(City Information Office)