Davao City – Padayon karon nga giimbistigahan sa Nabunturan Municipal Police Station ang nahitabong disgrasya kagahapong adlawa nga naglambigit sa Bachelor Express Bus ug Metro Shuttle Bus nga mikalas sa lima ka mga kinabuhi.
Nahitabo ang disgrasya sa may Kilometro 91 Nabunturan Highway Compostela Valley Province diin nagpasad ang mga pasahero samtang gihimo ang rescue operation sa mga sakop sa Bureau of fire Protection, Kapolisan ug mga individual nga boluntaryong mitabang sa pagluwas sa mga pasahero.
Pinasubay sa inisyal nga report sa Kapolisan, Lima ang giingong On the Spot nga namatay samtang ubay-ubay usab ang nahimong samaron nga pulos gipangdala sa Compostela Valley Provincial Hospital sa Montevista. Samtang ang ubang samaron nga anaa sa peligro ang kinabuhi, gipangbalhin sa Davao Regional Medical Center sa syudad sa Tagum.
Nasayran nga ang Bachelor padung sa Davao City samtang ang Metro Shuttle padung sa New Bataan, ComVal. Sa inisyal nga imbestigasyon sa otoridad, wa na mabawi sa matag-usa ka drayber ang manubela gumikan sa kadangog sa kalsada dala sa pagbunok sa ulan sa dapit.
Ang kapulisan padayong naghimo og makuting imbestigasyon sa hitabo aron masayran kinsa ang mapanubag sa maong disgrasya. Hinuon, andam ang duha ka kompanya nga motubag sa galastuhan sa mga biktima sa maong bangga.