Cebu City- Gipahibawo sa Land Transportation Office o LTO-7 nga ila nang buksan ang uban nilang opisina sa Sugbo sugod karong Miyerkoles, Mayo 20.
Mao kini gi-teks ni Director Victor Caindec sa mga sakop sa media gahapon sa buntag.
Matod ni Caindec, ang mga buhatan lang sa dakbayan sa Sugbo ug Mandaue ang dili pa mangabli sanglit ubos pa man sa ECQ o Ehanced community quarantine (ECQ).
Sumala pa ni Caindec, ang pagbukas sa ilang mga buhatan gawas sa siyudad sa Sugbo ug Mandaue motutok sa pag-atiman ang mga renewal transactions.
Gipahibawo usab sa opisyal nga ang ilang opisina sa Toledo City pabiling serado tungod sa gipahigayong renovation aron pagtuman sa social distancing protocol sa gobyerno.
Ang mga buhatan sa LTO 7 nga mangabli na sa sunod adlaw mao ang Lapulapu District Office, Island Mall Mactan Licensing Center, Talisay Extension Office, Carcar District Office, Balamban Licensing Center, Danao District Office, Medellin Extension Office, Camotes Extension Office, ug Bantayan Extension Office.
Pero sa wala pa kini, una nang gibuksan sa LTO 7 ang ilang mga buhatan sa Negros Oriental ug Bohol niadtong Mayo 13.