Nakadawat og payout ang 216 ka benepisyaryo sa Tulong Panghanap-buhay para sa Ating Displaced/Disadvantaged Workers (TUPAD) Program kagahaping adlawa, Enero 5, sa Dapitan City Government Center, isip pagsugod sa mga programa sa lokal nga gobyerno alang sa tuig 2026.
Ang payout gipangunahan ni Mayor Evelyn T. Uy human sa unang flag ceremony sa tuig, ubos sa programa sa Department of Labor and Employment (DOLE) nga naghatag og temporaryong trabaho sa mga displaced ug disadvantaged workers sa siyudad.
Ang mga benepisyaryo, nga gikan sa 50 ka barangay sa Dapitan City, nakatrabaho sulod sa 10 ka adlaw ug nakadawat og kantidad nga PhP 4,140 matag usa isip sweldo. Lakip niini ang mga residente nga naapektuhan sa kalisod sa panginabuhian, kalamidad, ug kakulang sa permanenteng trabaho.
Gipasalamatan ni Mayor Uy ang DOLE ug ang mga lokal nga opisyal sa ilang kooperasyon sa malampusong pagpatuman sa programa.
Pinaagi sa maong programa, padayon nga ginapalig-on sa Dapitan City ug DOLE ang ilang paningkamot sa paghatag og oportunidad ug pagpauswag sa kahimtangan sa kinabuhi sa mga residente sa siyudad.(IKEN B. GULLEM)
Source: Zamboanga del Norte Provincial News Network