Kapin 7,000 ka panimalay sa lungsod sa Sindangan ang target nga makabenepisyo sa ₱5 milyones nga Rice Distribution Program sa Department of Social Welfare and Development (DSWD), nga nagtumong sa pagpalig-on sa food security ug pagtabang sa mga pamilyang adunay panginahanglan.
Nasugdan na ang distribusyon sa Barangay Titik diin 525 ka panimalay ang nakadawat og bugas, ug sa Barangay Bucana nga adunay 315 ka benepisyaryo. Nagpadayon usab ang pagpanghatag sa Barangay Talinga alang sa 523 ka panimalay ug sa Barangay Caluan nga adunay 450 ka benepisyaryo.
Matag kwalipikadong benepisyaryo makadawat og 12.5 ka kilo nga bugas, isip kabahin sa programa sa DSWD aron maibsan ang gasto sa pagkaon sa mga kabalayan.
Sa kinatibuk-an, 7,242 ka panimalay ang target nga mahatagan og ayuda, uban sa distribusyon nga magpadayon hangtod sa Hunyo 30, 2026. Ang maong inisyatiba kabahin sa padayon nga paningkamot sa gobyerno sa paghatod sa serbisyong sosyal ug pagseguro nga ang tabang maabot sa mga pamilyang labing nanginahanglan.(IKEN B. GULLEM)
Source: Municipality of Sindangan