Giporma sa Provincial Government of Zamboanga del Norte ang ₱105-milyon nga contingency action plan aron matabangan ang mga mag-uuma ug maprotektahan ang produksiyon sa pagkaon samtang nagpadayon ang epekto sa dugay nga dry spell sa pipila ka lugar sa probinsya.
Gipresentar ang mga lakang sa proposed contingency plan ni Engr. Jonarex Miral atol sa 3rd Quarter Provincial Disaster Risk Reduction and Management Council (PDRRMC) meeting niadtong Septiyembre 4, 2026, sa Zamboanga del Norte Convention and Exhibition Center.
Base sa datos hangtod Agosto 31, mga 210 ektarya nga humayan sa Siocon ang naapektuhan sa dugay nga pagkauga sa panahon, nga miresulta sa gibanabanang ₱738,000 nga kadaot. Sa Roxas, usa usab ka ektarya sa humayan ang naapektuhan, apan tungod sa pest infestation.
Sa sayong advisory sa DOST-PAGASA niadtong Hulyo bahin sa posibleng epekto sa El Niño, gihangyo ni Governor Darel Dexter T. Uy ang Department of Agriculture–Regional Field Office IX (DA-RFO IX) nga mag-preposition og Quick Response (QR) agricultural inputs alang sa mga prayoridad nga commodities sa probinsya.
Sakop sa proposed ₱105-milyon nga contingency plan ang upat ka prayoridad nga sektor—rice, corn, high-value crops ug fisheries.
Samtang nagpadayon ang proseso sa pag-finalize sa contingency plan, gipadayon usab sa probinsya ang pagpalig-on sa vegetable production pinaagi sa EGBU Scale-Up program.
Karon, adunay 47 ektarya nga gitanoman sa mga miyembro sa 47 ka farmers’ associations, samtang laing 56 ektarya ang andam na alang sa implementasyon.
Tumong sa mga lakang nga masiguro ang food supply sa probinsya ug mahatagan og tukmang tabang ang mga mag-uuma samtang nagpadayon ang hulga sa dry spell ug climate-related nga mga epekto sa agrikultura.(IKEN B. GULLEM)
Source: Zamboanga del Norte Provincial News Network