Nakadawat ug usa ka yunit sa bag-ong four-wheel drive (4WD) tractor nga nagkantidad ug ₱1.5 milyon ang ALVISIJE Irrigators Association, Inc. gikan sa Department of Agrarian Reform (DAR)–Zamboanga del Norte ubos sa Climate-Resilient Farm Productivity Support Project (CRFPSP) – Major Crop-Based Block Farm Productivity Project, pinangulohan ni Provincial Agrarian Reform Program Officer II (PARPO II) Daisy Dell Suan Digamon, atol sa turnover ug blessing ceremony nga gipahigayon kaniadtong Oktubre 24, 2025, sa Brgy. Bobongan, Labason, Zamboanga del Norte.
Si Engr. Alfonso Tan, OIC-PARPO I ug Chief of PBDD, mipasabot sa tulo ka mandato sa DAR ug sa padayon nga paningkamot niini sa pagpauswag sa panginabuhi sa mga mag-uuma pinaagi sa sustainable nga mga programa sa agrikultura. Samtang, si PARPO II Digamon nagpasalamat sa oportunidad nga mahimong kabahin sa kalamboan sa agrikultura ug mipasalig nga magpadayon ang mga inisyatibo sa DAR aron mapaligon ang produksiyon ug resiliency sa mga mag-uuma sa lalawigan.
Human sa turnover, gipirmahan usab ang Memorandum of Agreement (MOA) tali sa DAR ug sa asosasyon nga gisaksihan nila Board Member Kaye Marie Bolando, Municipal Administrator Stephanie Cezar, SB Secretary Hermon Abaya, ug ALVISIJE President Severino Macasling, aron pormal nga ipakita ang panaghiusa alang sa kalamboan sa kabukiran.(Iken B. Gullem)
Photo courtesy: DAR Zambonorte