Gipaabot sa Zamboanga del Norte Police Provincial Office (ZNPPO) atol sa press conference niadtong Agosto 24 ang pag-awhag sa publiko nga magmabinantayon sa mga pagpanghulga nga gipakatap pinaagi sa social media.
Sa maong press conference, gipahibalo ni Dipolog Chief of Police PLtCol Khisna Asaali nga padayon ang imbestigasyon sa mga social media account nga nalambigit sa mga post nga adunay hulga batok sa pipila ka tulonghaan, magtutudlo ug estudyante sa probinsya.
Nakapahinabog kabalaka sa mga ginikanan, estudyante ug komunidad ang maong mga post, ilabi na sa Dipolog ug Dapitan diin nalambigit ang pipila ka tulonghaan.
Matud sa ZNPPO, ubos sa pagpangulo ni Provincial Director PCol Reydante E. Ariza, gisusi sa kapolisan ang motibo ug gigikanan sa maong mga hulga.
Gipakusgan usab sa kapolisan ang pagpatrolya sa mga tulonghaan, ilabi na sa oras sa pagsulod sa mga estudyante. Gipahinumdoman ang mga school head, security guard ug barangay tanod nga higpitan ang seguridad ug sundon ang tukmang safety protocols.
Sa kaso sa Punta National High School, nasuta nga natangtang dayon ang hulga nga post human kini ma-share, hinungdan nga wala pa matino kung kinsa ang unang nag-post niini.
Samtang, ang account nga migamit sa ngalan sa Miputak Elementary School nasuta nga usa ka dummy account. Human sa koordinasyon sa kapolisan ug sa administrasyon sa eskwelahan, napamatud-an nga wala sa listahan sa maong tulonghaan ang ngalan sa tawo nga giingong nag-post.
Gipatin-aw usab sa kapolisan nga kung menor de edad ang nalambigit, lahi ang legal nga proseso ug mga probisyon sa balaod nga magamit. Ang maong kaso gisusi pinaagi sa case study uban sa DSWD ug CSWDO.
Sumala sa ZNPPO, ang mga nahisgotang hulga online walay lig-ong basihan ug posibleng gihimo lamang aron magpahinabog kalisang ug kagubot sa publiko.
Gipasalig ni PCol Ariza nga andam ang ZNPPO sa pag-atubang sa bisan unsang tinuod nga hulga, apan gikinahanglan ang kooperasyon sa publiko aron mapadayon ang kalinaw ug seguridad sa mga komunidad ug tulonghaan sa Zamboanga del Norte.(IKEN B. GULLEM)
Source: Zamboanga del Norte Provincial News Network