Nagpadayon ang suporta ni Zamboanga del Norte Governor Darel Dexter T. Uy kang Alford G. Malicay, 32 anyos, nga nagpadayon sa iyang pagtambal batok sa Papillary Thyroid Carcinoma.
Niadtong Agosto 24, personal nga gihatagan ni Governor Uy si Malicay og ₱20,000 nga medical financial assistance aron makatabang sa umaabot niyang galastuhan sa pagtambal.
Si Malicay, residente sa Barangay Balatakan, Jose Dalman, bag-ohay lang nga naoperahan sa Southwestern University Medical Center sa Cebu City diin gipailalom siya sa thyroidectomy ug modified neck dissection.
Human sa operasyon, girekomendar siya alang sa Radioactive Iodine (RAI) Therapy, nga gibanabana nga mokabat sa ₱93,560. Nakadestino ang maong sunod nga pagtambal sa Setyembre 14, 2026 sa Perpetual Succour Hospital, Inc. sa Cebu City ubos sa pagdumala ni Dr. Charles Tan, usa ka Nuclear Medicine Specialist.
Ang operasyon ug pagpahospital ni Malicay mikabat sa kapin ₱650,000, nga natabangan pinaagi sa mga guarantee letter ug pinansyal nga suporta gikan sa nagkadaiyang ahensya ug opisyal sa gobyerno.
Apan samtang misulod na siya sa sunod nga yugto sa iyang cancer treatment, mitungha na usab ang bag-ong mga galastuhan. Mao kini ang gitumong sa dugang nga assistance gikan sa gobernador aron makatabang sa pamilya sa pagpadayon sa iyang pagtambal.
Dako ang pasalamat sa pamilya ni Malicay sa padayon nga tabang nga ilang nadawat gikan sa mga indibidwal, ahensya ug opisyal nga mitabang sa iyang pag-atubang sa sakit.(IKEN B. GULLEM)
Source: Zamboanga del Norte Provincial News Network