Nakadawat og libreng konsultasyon ug medikal nga serbisyo ang mga kababayen-an ug mabdos gikan sa nagkalain-laing munisipyo sa Zamboanga del Norte atol sa OB-Gyne care activity nga gipahigayon sa Zamboanga del Norte Medical Center. Ang kalihokan gipangunahan ni Dr. Dino James Abong, OB-Gyne specialist nga nakabase sa Vicente Sotto Memorial Hospital.
Kinatibuk-ang 49 ka pasyente ang nakapahimulos sa libreng check-up, lakip ang mga nagbiyahe pa gikan sa layong lugar sama sa Baliguian. Pipila sa mga pasyente ang nakadawat og agarang medikal nga atensyon ug malampusong operasyon, lakip ang pagtangtang sa dugay nang IUD ug pag-atiman sa ovarian polyps nga hinungdan sa dugay nang pagdugo-dugo sa usa ka pasyente.
Nahimo kining posible pinaagi sa Kuyog Ta Health Care Program ubos sa suporta ni Gobernador Darel Uy, kauban ang ZNMC Medical Team. Giila usab sa mga pasyente ang papel ni Dr. Esmeralda Nadela, hospital administrator, ug ni Herdina Gallegos, hepe sa Medical Team, sa hapsay nga pagdumala ug pag-atiman, nga nagpalig-on sa tumong nga madala ang de-kalidad nga serbisyong medikal duol sa katawhan.(JENIFFER JR. DELICA)
Source: Zamboanga del Norte Provincial News Network