Mipakita sa nasudnong entablado ang Zamboanga del Norte atol sa PTAA 33rd Travel Tour Expo 2026 nga gipahigayon sa SMX Convention Center Manila, usa sa pinakadakong travel trade events sa nasud nga gitambongan sa liboan ka travel enthusiasts, industry leaders, ug exhibitors.
Girepresentar sa Provincial Tourism Officer Philetta A. Tiempo ang Probinsyal nga Pangagamhanan sa Zamboanga del Norte sa pagpasundayag sa mga natural nga atraksyon, kulturanhong kabilin, ug nagkalain-laing tourism experiences sa probinsya ngadto sa mga travel agents, corporate buyers, ug tourism stakeholders.
Pinaagi sa provincial booth, gipaila sa mga bisita ang mga destinasyon, curated travel products, ug mga serbisyo sa turismo nga nagpakita sa nagkadugang nga kaanyag sa Zamboanga del Norte isip usa ka destinasyon sa Mindanao. Gihatagan usab og higayon ang probinsya sa pagpalapad sa koneksyon ug pagpalig-on sa market reach pinaagi sa promosyon ug pakig-partner sa industriya.
Ang pag-apil sa Travel Tour Expo 2026 nagpalig-on sa paningkamot sa Probinsyal nga Pangagamhanan sa pagpalambo sa sustainable tourism ug pagdani og dugang nga bisita ug pamuhunan, nga nag-awhag sa nasud ug sa kalibutan nga masinati ang katahum, kultura, ug potensyal sa Zamboanga del Norte.(JENIFFER JR. DELICA)
Source: Zamboanga del Norte Provincial News Network