Pinaagi sa padayon nga pagpatuman sa No Balance Billing (NBB) Policy ug aron masiguro nga walay pasyenteng mabug-atan sa gasto, nagpadayon ang Zamboanga del Norte Medical Center (ZNMC) sa paghatag og libreng tambal sa mga ‘indigent patients’ sa probinsya.
Laing hugpong sa mga pasyente ang nakabenepisyo sa maong programa, ilabina kadtong gi-admit sa ospital ug kwalipikado ubos sa NBB. Tungod niini, mas napalig-on usab ang Zero Billing Policy nga nagtumong sa pagtabang sa mga kabus nga sektor sa komunidad.
Sumala ni Gobernador Darel Uy, usa sa iyang prayoridad ang pagsiguro nga matag ‘indigent patient’ makadawat sa gikinahanglan nilang tambal nga walay bayranan. Iyang gipasabot nga ang inisyatiba dili lamang usa ka polisiya, kundili usa ka konkretong lihok aron mapaduol ug mapahapsay ang serbisyo sa panglawas alang sa tanang katawhan.
Tumong sa programa nga walay bisan kinsa nga mapasagdan tungod sa kakulang sa kuwarta, ug matag pasyente hatagan og patas nga kahigayunan nga makaayo.
Nagpaluyo sa kalampusan sa maong paningkamot ang walay hunong nga dedikasyon sa medical team sa ZNMC nga nagserbisyo 24 oras matag adlaw.(IKEN B. GULLEM)
Source: Zamboanga del Norte Provincial News Network