Gipahibalo ni Governor Darel Dexter Uy atol sa iyang unang State of the Province Address o SOPA nga misaka na ngadto sa Level 2 General Hospital ang Zamboanga del Norte Medical Center, usa sa mga mahinungdanong kalampusan sa sektor sa panglawas sa probinsya.
Gibutyag usab sa gobernador nga sukad Hulyo 2025 hangtod Abril 2026, kapin 47 mil ka pasyente ang na-admit sa ZNMC, samtang nakahimo kini og kapin 242 mil ka laboratory tests, 25 mil ka radiology procedures ug nakatigom og 11 mil ka blood units pinaagi sa Blood Bank niini.
Gipasiugda usab ni Uy nga operational na ang fully equipped 18-station dialysis clinic sa maong ospital ug padayon nga nagsilbi isip referral center sa mga pasyente gikan sa nagkalain-laing lungsod sa Zamboanga del Norte.
Dugang pa sa gobernador, liboan na usab ka mga ZaNortehanon ang nakabenepisyo sa libreng medical missions, espesyalistang konsultasyon ug referral assistance ngadto sa Cebu ug Manila isip kabahin sa paningkamot sa probinsyal nga panggobyerno nga mapalapad ug mapalambo ang serbisyo panglawas sa katawhan.(JENIFFER JR. DELICA)
Source: Dipolog City Government/ZNMC