Mihayag ang kagabhion sa Provincial Capitol Plaza samtang misubang ang kanindot sa libolibo ka Christmas lights, naghulma ug palibot nga mura’g sugilanon, ug misagubang sa hiyos sa tawo nga nagpaabut sa pinakakabantog nga sinugdanan sa yuletide season sa Zamboanga del Norte, ang “Kuyog Ta! Pasko sa Bag-ong Zanorte” Christmas Switch-On Ceremony.
Libohan ka mga Zanortehanon ang mitapok sa plaza, nga misugod sa prelude sa Homeboys Band ug gisundan sa kolorful nga Nutcracker Parade uban nila Governor Darel Dexter Uy, Vice Governor Julius Napigquit, ug ubang opisyal sa probinsya.
Misunod ang madasigon nga pasundayag nila Amica Chardale Bonbon, ZANCOCO Cosplay Group, ug TNT singers nga sila Iza Vallejo ug Breya Dullente, nga nakadugang sa festive vibe sa plaza.
Sa mensahe ni Gov. Uy, nagpasalamat kini sa kalampusan sa kalihokan ug gipasabot nga ang “Kuyog Ta!” nag-awhag sa panaghiusa ug sa tinuod nga espiritu sa Pasko.
Sa pinakatin-aw nga higayon sa gabii, gipangunahan sa gobernador ang countdown, ug pagkahuman niini misidlak ang Plaza Capitol sa kahayag, gisundan sa makapakurog nga fireworks display, timaan sa opisyal nga pagsugod sa Pasko sa Bag-ong Zanorte.
Samtang nagselebrar ang plaza, liboan ang miduyog pinaagi sa live coverage ug mipadayag sa ilang pagdayeg sa kahayag, performers, ug kahugyaw sa selebrasyon.(IKEN B. GULLEM)