Malampuson nga gipahigayon ang Ayuda para sa Kapos ang Kita Program (AKAP) payout kaniadtong Disyembre 8, 2025 sa Dipolog City Sports Complex, aron hatagan ug pinansyal nga tabang ang mga kwalipikadong benepisyaryo nga nag-atubang ug kalisod pinansyal.
Ang kalihokan gipasiugdahan sa Department of Social Welfare and Development (DSWD) uban sa koordinasyon sa City Government of Dipolog pinaagi sa City Social Welfare and Development Office (CSWDO). Tumong niini ang paghatag ug direkta ug dali nga tabang sa mga apektadong pamilya.
Mitambong sa payout si Mayor Roberto Y. Uy kauban si CSWD Assistant Officer Jovencia D. Gregory, nga nagpakita sa padayong suporta sa lokal nga kagamhanan alang sa mga sector nga labing nanginahanglan ug sa epektibong pagpadagan sa mga programa sa social protection.
Kini nga programa usa sa mga lakang sa LGU ug DSWD aron matabangan ang katawhan nga apektado sa kakulang sa kita, ug usa kini ka pamaagi sa pagpalig-on sa social safety nets sa siyudad.(IKEN B. GULLEM)
Source: Dipolog City Government