Gipirmahan sa Department of Science and Technology-Region IX (DOST-IX), pinaagi sa PSTO-Zamboanga del Norte, ug sa Local Government Unit (LGU) sa Mutia ang usa ka Memorandum of Agreement (MOA) alang sa pagpatuman sa “Upgrading the Greenhouse Facility of LGU Mutia Hydroponic Farm” nga adunay kantidad nga ₱2.3 milyon.
Gipondohan ang proyekto pinaagi sa Grant-in-Aid (GIA) Program sa DOST-IX, samtang naghatag usab ang LGU-Mutia og ₱738,000 nga counterpart fund.
Pinaagi sa 180-square meter nga gipauswag nga greenhouse facility, gilauman nga makaproduce og 3,000 hangtod 5,000 ka ulo sa leafy vegetables matag production cycle ug masiguro ang tibuok-tuig nga produksyon bisan pa sa mga epekto sa pagbag-o sa klima.
Gilaraw usab ang pasilidad nga mahimong demonstration farm, production unit ug learning center, samtang labing menos 30 ka kababayen-an ang mabansay sa hydroponic production, system management ug agribusiness aron mapalambo ang ilang panginabuhian.
Sumala sa DOST-IX, ang maong proyekto kabahin sa padayon nilang suporta sa mga inisyatibo sa siyensya ug teknolohiya aron mapalig-on ang agrikultura, mapataas ang produksyon ug mapaayo ang panginabuhi sa mga komunidad.(IKEN B. GULLEM)
Source: DOST Regional Office No. IX