Luwas nga miabot ang 835 ka delegado sa Zamboanga del Norte–Dipolog City–Dapitan City Athletic Association (ZANDIDAA) sa Isabela City sayong buntag Abril 2 alang sa ilang partisipasyon sa Zamboanga Peninsula Regional Athletic Association Meet 2026.
Ang delegasyon gilangkuban sa 615 ka atleta ug 220 ka opisyal nga andam mosabak sa kompetisyon sugod Abril 6 hangtod 11, dala ang paglaum ug determinasyon sa pagdala og dungog sa ilang tagsa ka lokalidad.
Gipaabot sa mga lider sa probinsya ug mga syudad, lakip si Governor Darel Dexter Uy ug mga mayor sa Dipolog ug Dapitan, ang ilang bug-os nga suporta sa mga atleta, samtang gi-awhag sila nga magpabiling disiplinado, lig-on, ug adunay pagtuo sa ilang paningkamot.
Gilauman nga pinaagi sa maong regional meet, mapakita sa mga atleta ang ilang talento ug sportsmanship, samtang gipasiugda usab ang panaghiusa ug kalinaw ubos sa tema nga nagpalig-on sa panaghiusa pinaagi sa dula.(JENIFFER JR. DELICA)
Source: Zamboanga del Norte Provincial News Network