Nagpadayon ang probinsya sa pagpalig-on sa lokal nga sistema sa panglawas pinaagi sa 3rd Quarter Local Health System Maturity Level Monitoring Meeting nga gipahigayon sa Dipolog City, diin gisusi ang kahimtang ug pagpatuman sa mga programa sa panglawas sa tibuok Zamboanga del Norte.
Gipangunahan sa Department of Health (DOH) ug Integrated Provincial Health Office (IPHO) ang maong kalihokan, nga naglakip usab sa pormal nga pagtugyan sa pondo alang sa UHC Tranche ug Local Investment Plan for Health Tranche aron masuportahan ang mga panginahanglanon sa lokal nga health system.
Misalmot ug mipakita og suporta si Governor Darel Dexter T. Uy, uban sa mga opisyal sa DOH ug Provincial Health Office, lakip sila Dennis Antonio A. Dacayanan, Augusto Manolo G. Alpichi, ug Benson D. Panaguiton.
Atol sa kalihokan, gipresentar ni Engr. Rosabelle K. Villa, Senior Health Program Officer sa Zamboanga Peninsula-Center for Health Development, ang mga update kabahin sa kahimtang sa mga programa. Ang monitoring naghatag og higayon aron mailhan ang mga kinahanglan pang palig-onon ug mapaayo ang paghatag sa serbisyo panglawas ngadto sa mga komunidad sa Zamboanga del Norte.(IKEN B. GULLEM)
Source: Zamboanga del Norte Provincial News Network