Gihirang nga kampeonato ang Local Government Unit of Dipolog sa Vocal Solo Competition, samtang ang host nga LGU Dapitan maoy midaog sa Latin American Category sa Dance Sports Competition atol sa 17th Inter-Government Agency Sports (IGAS) nga gipahigayon niadtong Septiyembre 15 sa City Government of Dapitan Grounds.
Kabahin ang duha ka kompetisyon sa socio-cultural activities sa 17th IGAS, diin nagtapok ang mga empleyado sa nagkalain-laing ahensya sa gobyerno isip kabahin sa pagsaulog sa Civil Service Week 2026. Giablihan ang programa ni Atty. Jerry N. Mayormita, Acting Director III sa Civil Service Commission Regional Office IX.
Sa Vocal Solo Competition, LGU Dipolog City ang nahimong champion, gisundan sa DepEd Dapitan isip 1st Runner-Up, LGU Polanco isip 2nd Runner-Up, ug LGU Sergio Osmeña isip 3rd Runner-Up. Samtang sa Dance Sports–Latin American Category, LGU Dapitan ang nakakuha sa kampeonato, gisundan sa Dr. Jose Rizal Memorial Hospital (DJRMH), LGU Sibutad ug LGU Sindangan.
Gipakita sa maong mga kompetisyon ang lain-laing talento sa mga government employees nga wala lamang nagkompetensya sa mga sporting events, kondili apil usab sa mga kalihokan nga nagpalambo sa performance, creativity, disiplina ug panaghiusa.
Magpadayon ang 17th IGAS isip usa ka semana nga kalihokan nga nagpalig-on sa fellowship ug camaraderie sa mga public servants pinaagi sa sports ug socio-cultural activities.(IKEN B. GULLEM)
Source: Dapitan City Government